Gwreg yaouank a Sant-Malo, deac'h (1) (bis)
D'he frenestr a ouele, d'an neac'h (1) (bis)

"Siwazh, siwazh, me zo tizhet ! (bis)
Va eostig paour a zo lazhet ! (bis)

- Lavarit din, va gwreg nevez
Perak 'ta savit ker lies

Ker lies diouzh va c'hostez-me
E-kreiz an noz, diouzh ho kwele

Diskabell-kaer ha diarc'hen
Perak 'ta savit evel-hen ?

- Mar savan, den ker, evel-se
E-kreiz an noz, diouzh va gwele

Da eo ganin, setu, gwelet
Al listri bras mont ha donet

- Ne d-eo ket, vat, evit ul lestr
Ez it ker lies d'ar prenestr

Ne d-eo ket evit al listri
Nag evit daou nag evit tri

Ne d-eo ket evit o gwelet
Kennebeut al loar, ar stered

Va itron, din-me lavarit
Da berak bep noz e savit

- Sevel a ran da vont da sell
Ouzh va bugel en e gavell

- Ne d-eo ket ken evit sellet
Sellet ouzh ur bugel kousket

Ne d-eo ket gevier a fell d'e
Da berak savit evel-se ?

- Va denig kozh, ma na daerez,
Me lavaro ar wirionez

Un eostig a glevan bep noz
Er jardin, war ur bodig-roz

Un eostig bep noz a glevan
Ken ge e kan, ken dous e kan !

Ken dous e kan, ken kaer, ken flour
Bep noz, bep noz, pa sioul ar mor !"

An aotrou kozh 'dal m'he c'hlevas
En e galon a brederias

An aotrou kozh 'dal m'he glevas
En e galon a lavaras :

"Pe mar 'mañ gwir, pe ma n'eo ket
An eostig a vo paket !"

Antronoz-beure, pa savas
Da gaout ar jardinour ez eas

"Jardinour mat, sentit ouzhin
Un dra zo a ra glac'har din

Er c'harzh ez eus un eostig-noz
Ne ra nemet kanañ en noz

'Hed an noz ne ra 'met kanañ
Ken ma on dihunet gantañ

Mar 'mañ paket fenoz ganit
Ur gwenneg aour a roin-me dit"

Ar jardinour pa'n deus klevet
Un ulmennig en deus stegnet

Hag an eostig en deus paket
Ha d'e aotrou 'n'eus hen kaset

Hag an aotrou, pa hen dalc'has
A-walc'h e galon a c'hoarzhas

Hag e vougas, hag e daolas
War barlenn wenn an itron keazh (1)

"Dalit, dalit, va gwreg yaouank
Setu amañ hoc'h eostig koant

Me 'm eus hen paket evidoc'h
'Michañs, va dous, e plijo deoc'h"

He den yaouank, 'dal ma klevas
Gant glac'har vras a lavaras :

"Setu ma dous ha me tizhet
Ne c'hallfont mui en em welet

Da sklaerder loar, d'ar prenester
'Vel ma oamp boazet da ober"