I
An Aotrou 'r C'hont hag he bried
Yaouankik mad 'zo dimezet;

Unan daouzek, un-all trizek.
A-benn nav miz gwillioudet.

'N Aotrou ar C'hont a c'houlenne
Eus e bried, un deiz a oe:

- Ma fried, din-me lavaret
Petra diganin c'hoantaet?-

- Un tam kig glujar pe kig gad
A c'houlennan, dimeus ar c'hoad.

An Aotrou 'r C'hont, p'hen eus klevet,
En e fuzuilh ez eo kroget ;

En e fuzuilh ez eo kroget,
Da ober ur bale eo aet.

E-barzh ar c'hoad p'eo antreet,
Kornandonez gantañ digouet:

- Deiz-mad deoc'h-c'hwi, Aotrou ar C'hont,
Me oa pell-zo 'klask ho rankontr;

Bremañ p'am eus ho rankontret,
Eureujiñ din-me a rankfet. -

- Eureujiñ deoc'h-c'hwi na rin ket,
Rak me 'zo nevez-dimezet;

Rak me 'zo nevez-dimezet,
Ma gwreg 'n noz-mañ gwillioudet.-

- Daoust deoc'h pe vervel 'dan tri deiz,
Pe chom seizh bloaz war ho kwele;

Mervel endan an tri deiz-mañ,
Pe chom seizh bloaz war h' kwele klañv.-

- Gwell ganin mervel 'dan tri deiz,
'Vit chom seizh bloaz war ma gwele;

Rak ma gwregig a zo yaouank'
'Defe ganin kalz nec'hamant. -

II
An Aotrou ar C'hont a lare
D'e vamm, er gêr pa arrue:

- Ma mamm, 'grit-c'hwi me gwele din,
Biken anezhañ na savin ! -

- Ma mab ker' din-me lavaret'
Petra ganeoc'h 'zo arruet ?-

- O chaseal er c'hoad on bet,
Ur Gornandonez 'zo digouet,

Hag he deus din-me lavaret
Eureujiñ dezhi vije ret. -

- Ma mabig, din-me lavaret
Petra dezhi 'c'h eus respontet ?-

- Hag am eus dezhi respontet:
Eureujiñ deoc'h me ne rin ket,

Rak me zo nevez-dimezet,
Ma gwreg 'n noz-mañ gwillioudet.

'R Gornandonez, p'he deus klevet,
Din-me neuze deus lavaret: -

- Daoust deoc'h pe vervel 'dan tri deiz,
Pe seizh vloaz klañv war ho kwele.-

- Gwell ganin mervel 'dan tri deiz,
'Vit chom seizh bloaz war ma gwele,

Rak ma gwregig a zo yaouank
Defe ganin kalz nec'hamant.-

Ma mammig paour, mar am c'haret,
Eus ma fried n'anzavfet ket;

Eus ma fried n'anzavfet ket,
Ken 'vo eus he gwele savet.

III
Itron ar C'hont a c'houlenne
Digant he mamm-gaer en deiz-se:

- A zo gant ma fried digouet,
Pa na deu-han ket d'am gwelet?-

- Da chaseal d'ar c'hoad eo aet,
Er gêr n'eo ket c'hoazh arruet;

Aet eo da chaseal d'ar c'hoad,
Da glask deoc'h un draig bennak. -

Itron ar C'hont a c'houlenne,
Eus he mitizhien en deiz-se:

- Ma mitizhien, din-me laret,
Gant ar mevelien 'zo digouet

Petra gante a zo digouet,
Na ma ouelont-i ken dourek?-

- O tourañ ar c'hezeg int bet,
Ar marc'h gwellañ o deus beuzet. -

- Laret dezhe na ouelfont ket'
Pa vin yac'h, re all 'vo prenet.-

Itron ar C'hont a c'houlenne
Eus he mitizhien en deiz-se:

- Ma mitizhien, din-me laret'
Petra ganeoc'h 'zo c'hoarvezet ?

Petra 'zo ganeoc'h c'hoarvezet
Na ma ouelet-c'hwi ken dourek,-

- O kannañ 'r c'houez ez omp bet,
Liñselioù gant an dour 'zo aet. -

- Ma mitizhien, na ouelet ket,
Pa vin yac'h, re all 'vezo graet.-

Itron ar C'hont a c'houlenne
Eus he mitizhien en deiz-se:

- Petra 'zo nevez en ti-mañ,
Ma 'ma 'r veleien o kanañ ?-

- Ur paour a oa amañ lojet,
Hag a zo en noz-mañ marvet ;

Hag a zo en noz-mañ marvet,
Ha feteiz 'vezo douaret.-

Itron ar C'hont a c'houlenne
Digant he mamm-gaer en deiz-se:

- Pere dilhad a wiskin-me
'Vit monet d'an iliz feteiz ?-

- 'Ma gant 'r gwragez yaouank ar c'hiz
Em wiskañ 'n du d'vont d'an iliz.-

Itron ar C'hont a c'houlenne
Barzh an iliz pa arrue:

- Piv zo 'dan ma skabell douaret,
An douar zo nevez mesket?-

- Betek-henn am eus deoc'h kuzhet,
Hen ober pelloc'h n'hellan ket:

Hen ober pelloc'h n'hellan ket:
Ho pried zo aze douaret!-

Itron ar C'hont pa deus klevet,
Raktal d'an douar 'zo semplet;

Raktal d'an douar 'z eo semplet,
Ha war al lec'h ez eo marvet!