Va zad en deus va dimezet
Gant ur flaerius pilhaouer
E Lokeoret ez eo ganet
E koumanant Toull-al-Laer

Foei, foei, va zammig aotrou,
Gant e stoup hag e bilhoù
Foei, foei, va zammig aotrou,
Kerzh pa gari gant da dro !

Tri devezh goude va eured
En em gav foar Landerne
Ha va lapous, prim dihunet,
A sailh 'maez eus e wele

Foei, foei...

Drailhañ ra un hanter pater
Tanañ ra e gorn butun
Tapout a ra e grog pouezer
Evit mont war hent Sizun

Pa oa hanternoz sonet
En iliz vras ar Fouilhe
Me oa intañvez glac'haret
Va-unan 'barzh va gwele

Kavet en doa kamaraded
En ur vont da bilhaoua
E holl arc'hant a oa fouetet
Ha tamm pilhoù 'bet n'en doa

Pa 'z a Yannig d'ar pardonioù
Atav e vez mezv-dall
Prest e oa da goll e vragoù
E Lokeoret an deiz all

Pa zeuio ar c'hiz er vro-mañ
Da derriñ an dimezioù
Me a yelo en ur ganañ
Pell diouzh paotred ar pilhoù

Pa zeuio karrig an Ankou
D'ober e dro er vro-mañ
Me a gerzho war e roudoù
Hag hen pedo d'her sammañ

P'en devo an Ankou bountet
En toull va c'hozh pilhaouer
Me ziredo en ur ganañ
Da goumanant Toull-al-Laer

Komzet vo d'an aotrou person
Deus ar flaerius pilhaouer
'Vit ma kano al Liberon
Hag ouzhpenn Son al Lonker