I

Azenorig c'hlas zo dime'et
Ned eo ket d'he muiañ-karet

Azenorig c'hlas zo dime'et
D'he dousig kloareg ned eo ket

II

'Zenorig oa 'tal ar feunteun
Ha ganti ur vrozh seiz melen

War lez ar feunteun, hec'h-unan,
O pakat eno bleun balan

Da ober ur bokedig koant
Ur boked da gloareg Mezlean

Bout e oa-hi 'tal ar feunteun
Pa dremenas an Aotrou Youenn

'N Aotrou Youenn, war e varc'h glas
Kerkent, en ur redadenn vras

Kerkent, en ur redadenn vras
Hag outi damsellet a reas :

"Houmañ a vezo ma fried
Pe n'am bo, 'vit gwir, gwreg ebet !"

III

Kloareg Mezlean a lavare
Da dud e vaner, un deiz oe :

"Pelec'h eus ur c'hemengader
Ma skrivfen d'am dous ul lizher ?

- Kemengaderien vo kavet
Hogen e vint re ziwezhat"

"Va matezhig, din leveret,
Na petra zo amañ skrivet ?

- Azenor, me na ouzon ket,
Digoret-hen, hag e welfet"

Pe oa lakaet war he barlenn
'Zenorig a zeuas d'he lenn

Ne oa ket evit he lenn mat,
Gant daeloù eus he daoulagad

"Ma lavar gwir al lizher-mañ
'Mañ-eñ tost da vervel bremañ !"

IV

Ne oa ket he c'homz peuzlaret
Pe d'al leur-zi oa diskennet

"Petra nevez zo en ti-mañ
Pa welan 'n daou ver ouzh an tan

Pa welan 'n daou ver ouzh an tan
'N hini bras ha 'n hini bihan ?

Petra nevez zo en ti-mañ
Pa erru sonerien amañ ?

Pa erru sonerien amañ
Ha pachigoù a Germorvan

- En ti-mañ n'eus netra henozh
Nemet ho eured zo arc'hoazh

- Mard eo 'benn arc'hoazh ma eured
Mont a rin abred da gousket

Hag ac'hano ne savin ket
Ken da lienañ vin savet"

'Tronoz beure pa zihunas
He matezhig-gambr erruas

He matezhig-gambr erruas
Hag er prenestr en em lakaas

"Me wel an hent, ha poultrenn ennañ,
Gant kalz roñsed o tont amañ :

An Aotrou Youenn 'penn-kentañ
Ra vo torret e c'houg gantañ !"

D'e heul, ha flec'h ha marc'heien
Ha kalz tudjentil 'hed an hent

Ha dindanañ 'n inkane gwenn
Ur stern aouret war he gerc'henn

Ur stern alaouret penn-da-benn,
Un dipr voulous ruz war he gein

"Mallozh d'an eur e teu amañ !
D'am zad, d'am mamm, ar re gentañ !

Difennet eo d'an dud yaouank
Da heuliañ, er bed-mañ, o c'hoant"

V

Azenorig-c'hlas a ouele
O vont d'an iliz an deiz-se

Azenorig a c'houlenn
A-biou Mezlean pa dremene :

"Va fried, mar plij ganeoc'h-c'hwi
Me 'yel un tammig tre an ti

- Evit feteiz na yefec'h ket ;
Arc'hoazh e yefec'h, mar karet"

Azenorig druz a ouele
Ne gave den he frealze

Ne gave den he frealze
'Met he matezhig, hi a rae :

"Tavet, itron, na ouelet ket,
Gant Doue viot digollet"

Azenorig c'hlas a ouele
E-tan an aoter, da greizteiz

Adal 'n aoter bet' an nor sal
Oa klevet he c'halon strakal

"Tostait, ma merc'h, em c'hichen
Lakfen war ho piz ar walenn

- Poan zo ganin tostaat amañ
Pa n'am eus an hini 'garan

- Azenorig, pec'hiñ a rit
Un den a-feson ho peus bet

Perc'henn en arc'hant hag en aour
Ha kloareg Mezlean a zo paour

- Pa ven gantañ o klask ma boued,
Se na ra tra da zen ebet !"

VI

Azenorig a c'houlennas
E Kermorvan pa zegouezhas :

"Va mamm-gaer, din-me leveret
Pelec'h emañ ma gwele graet

- Bout 'mañ tal kambr ar marc'heg-du ;
Me ya d'hen diskouez deoc'h diouzhtu"

War he daoulin 'n em strinkas krenn
Dispalafet he blev melen

War an douar, gant gwir enkrez :
"Ma Doue ! Bet ouzhin truez !"

VII

"Va mamm itron, ha me ho ped,
Pelec'h emañ aet ma fried ?

- Er gambr d'an nec'h emañ kousket
Aet-hu di hag e frealzet"

Pa zeuas tre kambr he hini :
"Eurvat deoc'h, intañv", emezi

"Itron Varia hag an Drinded !
Evit intañv am c'hemerit ?

- 'Vit intañv n'ho kemeran ket
Hogen e berrig e viet

Setu amañ brozh ma eured,
A dalv, a gredan, tregont skoed

Houmañ vo d'ar vatezh vihan
He deus bet ganin kalzig poan

A zouge lizherioù kollet...
A Vezlean d'hon zi, va fried

Setu ur vantell nevez-flamm
Zo bet brodet din gant va mamm

Houmañ vo roet d'ar veleien
Da bediñ Doue 'vidon-me

'Vit va c'hroaz ha va chapeled
Ar re-se zo deoc'h, ma fried

Miret-o mat, ha me ho ped,
Ma zalfec'h soñj eus ho eured"

VIII

"Petra zo degou'et er gêr-mañ
Pa son ar gloc'h war e gostez ?

- Azenor mervel he deus graet
He fenn war barlenn he fried"

Maner Henan, war un daol grenn,
Emañ bet skrivet ar werz-mañ

Maner Henan, 'tal Pont-Aven,
Da vout kanet da virviken

Barzh an Aotrou kozh he savas
Hag un dimezell he skrivas